Cydymffurfio â gofynion cyfreithiol y DU pan yn gweithio ym maes creu cynnwys radio a sain

Mae'r Safon hon yn ymwneud â chydymffurfio â'r agweddau ar ofynion cyfreithiol y DU sy'n berthnasol i greu cynnwys radio a sain - a sut maen nhw'n effeithio ar yr hyn y gellir ei wneud a'r hyn na ellir ei wneud yn rhan o'r broses honno.

Mae'n ymwneud â'r cyfyngiadau cyfreithiol perthnasol sy'n ymwneud â diogelu a lledaenu gwybodaeth am drosedd, yr heddlu ac achosion llys yn ogystal â'r gyfraith sy'n diogelu diogeledd cenedlaethol, trefn gyhoeddus, hawliau eiddo deallusol, hawliau mentrau masnachol, hawliau unigolion, hawliau lleiafrifoedd a phobl sy'n agored i niwed megis plant.

Mae angen i ddarlledwyr radio a sain wybod am gyfraith berthnasol y DU, fel y gallant adnabod achosion posibl o dorri hynny yn eu gwaith eu hunain, a chyfeirio at arbenigwyr cyfreithiol a rheolwyr golygyddol pan fydd angen.

Ymdrinnir â gofynion Cod Darlledu Ofcom ar wahân yn Safon RAC32: Cydymffurfio â chodau ymddygiad a safonau wrth weithio ym maes radio a sain.

Mae'r Safon hon yn berthnasol i bob un sy'n gysylltiedig â'r broses o greu cynnwys radio a sain ac nid yn unig y rhai hynny mewn rolau newyddiadurol yn benodol.

1. defnyddio gwybodaeth gywir er mwyn asesu cyfreithlondeb eich gweithgareddau a'ch allbynnau a phryd y dylech geisio cyngor arbenigol
2. mynychu achosion llys a chael manylion sylfaenol gan swyddogion y llys a dogfennau llys pan fydd yn briodol
3. cydymffurfio â'r cyfyngiadau cyfreithiol perthnasol sydd ynghlwm â phob achos a/neu stori benodol wrth ohebu o'r llys ar gyfer cynyrchiadau radio neu sain
4. sicrhau bod eich ffynonellau a'r wybodaeth gan eich ffynonellau'n berthnasol ac yn ddibynadwy
5. sicrhau nad yw eich gohebu'n effeithio ar unrhyw ymchwiliadau parhaus neu achosion troseddol sydd ar y gweill
6. defnyddio sianeli priodol i wneud heriau cyfreithiol pan wneir ymdrechion i gyfyngu eich mynediad
7. ceisio cyngor gan bobl briodol cyn mynd ati i ymchwilio ar y rhyngrwyd a allai olygu eich bod yn gweithredu'n groes i ddeddfwriaeth
8. sicrhau bod gennych y trwyddedau neu'r caniatadau angenrheidiol i ddefnyddio deunydd hawlfraint i greu cynnwys radio neu sain
9. ceisio cyngor gan bobl gymwys pan fyddwch yn ansicr o gyfreithlondeb eich gweithgareddau

1. deddfwriaeth bresennol sy'n berthnasol i'r diwydiant radio a sain gan gynnwys: Difenwi, Dirmyg, Hawlfraint ac Eiddo Deallusol, Preifatrwydd a rhyddid mynegiant, Diogelu Data, Cydraddoldeb a gwahaniaethu, Anweddustra, Deddf Cyfrinachau Swyddogol, Tremasu, Ffotograffau o blant, rhyddhau Eiddo, Hawliau a chaniatadau, Contractau, Atebolrwydd Cyhoeddus
2. egwyddorion Rheolaeth y Gyfraith yn y DU
3. strwythur bras y system gyfreithiol yn y DU a gofynion cyfreithiol sy'n benodol i'r gwledydd, rolau cyfreithiol a therminoleg
4. y cysyniad o gyfiawnder agored a hawliau, cyfrifoldebau a chyfyngiadau sy'n gysylltiedig â gohebu o'r llysoedd, cyhoeddi, mynediad i wybodaeth a rhyddid mynegiant
5. eich hawliau cyfreithiol i fynychu achosion llys, ac i gael manylion sylfaenol a gwybodaeth arall gan swyddogion y llys a dogfennau llys
6. y cyfyngiadau gohebu i ddiogelu'r broses gyfreithiol wrth ohebu am achosion troseddol sydd ar y gweill ar gyfer cynyrchiadau radio neu sain
7. y cyfyngiadau gohebu i ddiogelu hunaniaeth unigolion iau a dioddefwyr trosedd
8. egwyddorion cyffredinol difenwi 
9. y gallai eich ffynonellau a'ch nodiadau, ar gyfer ymchwiliadau troseddol, droi'n destun craffu cyfreithiol neu graffu gan yr heddlu
10. cwmpas a gofynion yr amddiffyniadau y gellir eu defnyddio mewn achosion difenwi, gan gynnwys: cyfiawnhad, sylw gonest, braint absoliwt ac amodol, y camau lliniaru sydd ar gael i ddarlledwyr
11. peryglon enllib mewn radio byw, deunydd archif neu ddeunydd ar-lein
12. y defnydd o waharddebau llys i gyfyngu darlledwyr oni bai y gellir ennill dadl budd y cyhoedd
13. hawliau mynediad i wybodaeth o dan ddeddfwriaeth Rhyddid Gwybodaeth a'r cyfyngiadau cyfreithiol ar fynediad o'r fath
14. cwmpas hawliau eiddo deallusol a'r hyn sydd wedi'i ddiogelu gan hawlfraint, gan gynnwys y cyfryngau cymdeithasol a chynnwys radio a sain a gynhyrchwyd gan y defnyddiwr
15. y camau unioni perthnasol o blaid achosion o dorri cyfrinachedd ac amddiffyniadau sy'n berthnasol iddynt
16. pan fo angen, sut mae deddfwriaeth yn wahanol mewn gwledydd a thiriogaethau eraill y gallech fod yn gweithio neu'n gweithredu ynddynt
17. sut i gyfeirio materion am gyngor arbenigol o fewn eich sefydliad - neu sut i gyrchu cyngor o'r fath yn annibynnol