Recordio sain

Mae'r Safon hon yn cynnwys recordio sain, ar leoliad gan ddefnyddio dyfeisiau recordio cludadwy, ac mewn stiwdios. Mae'n ymwneud â phrofi a gwirio cyfarpar a recordio sain o amrywiol ffynonellau.

Mae'n cynnwys monitro ac adnabod problemau gyda'r recordiad a llunio datrysiadau os bydd problemau technegol yn codi neu os bydd gofynion yn newid. Mae'n ymwneud â meddu ar ddealltwriaeth sylfaenol o acwsteg er mwyn adnabod a recordio sain o ansawdd darlledu.

Mae hefyd yn golygu sicrhau bod recordiadau wedi'u henwi'n briodol, eu labelu a'u storio'n ddiogel.

Mae'r Safon hon yn berthnasol i bob un sy'n recordio sain ar leoliad neu mewn stiwdio yn y diwydiannau radio a sain.

1. profi cyfarpar yn ofalus i sicrhau ei fod yn gweithio'n gywir
2. dethol meicroffonau priodol ar gyfer amodau penodol neu ganiatáu am nodweddion arbennig meicroffonau unigol wrth recordio
3. gwirio lefelau recordio a monitro mewnbynnau i sicrhau bod uchder y sain yn briodol
4. recordio sain i'r cyfrwng a'r fformat priodol
5. bod yn ddetholgar am yr hyn a gaiff ei recordio, gan ystyried faint o'r deunydd a recordiwyd yn wreiddiol sy'n debygol o gael ei ddefnyddio yn y cynnyrch terfynol
6. sicrhau bod gennych y deunydd sain angenrheidiol i wneud y broses olygu mor syml â phosibl, gan ystyried unrhyw faterion sy'n codi yn ystod y recordio
7. asesu lleoliad o ran ei addasrwydd, ac os bydd angen, gwneud darpariaeth i leihau problemau sŵn ymwthiol neu annisgwyl
8. adnabod unrhyw ddiffygion yn y sain, methiannau yn y system neu achosion mecanyddol o dorri i lawr, eu hunioni'n brydlon lle bo modd neu geisio cymorth priodol
9. enwi a labelu deunyddiau sain yn gywir yn unol â phrotocolau priodol, a'u harbed a'u storio'n ddiogel
10. sicrhau nad yw eich gweithredoedd yn peri risg ddiogelwch i eraill
11. cwblhau'r recordiad o fewn amserlenni penodedig

1. egwyddorion sylfaenol sain ac acwsteg
2. mathau o feicroffonau a'u nodweddion
3. cyfyngiadau allweddol wrth recordio sain
4. nodweddion gweithredu recordwyr digidol cludadwy a chyfarpar recordio stiwdio a chyfyngiadau'r cyfarpar sydd ar gael i chi
5. y gwahaniaeth rhwng rheoli lefelau'n awtomatig ac â llaw a'u goblygiadau mewn gwahanol sefyllfaoedd
6. sut i brofi a gwirio cyfarpar
7. sut i adnabod problemau gyda chyfarpar recordio, a beth i'w wneud i'w cywiro
8. nodweddion acwstig unrhyw stiwdio neu leoliadau a gaiff ei ddefnyddio
9. y problemau'n gysylltiedig â sŵn gwynt, seiniau annisgwyl a sŵn amgylchynol ar leoliad
10. y gwahanol ystyriaethau dan sylw wrth recordio sain o wahanol ffynonellau – gan gynnwys cyfweliadau, perfformiadau byw, digwyddiadau go iawn neu awyrgylch
11. goblygiadau recordio deunydd i'w olygu neu ei recordio ar gyfer darllediad fel petai'n fyw
12. y math ac amrywiaeth o ddeunydd y bydd angen i chi ei recordio er mwyn hwyluso golygu
13. yr amserlen a'r terfynau amser ar gyfer y gwaith recordio
14. y protocolau perthnasol ar gyfer labelu a storio deunydd sain