Hyrwyddo rheoli parhad busnes
Trosolwg
Mae’r safon hon yn ymwneud â darparu cymorth, yn enwedig i’r sectorau busnes a gwirfoddol, â rheoli parhad busnes, gan gynnwys cyngor a chymorth penodol i sefydliadau unigol. Y nod yw helpu i ddatblygu gwydnwch, i leihau effaith argyfyngau ar sefydliadau a busnesau bregus, a’u galluogi i adfer yn gynt yn sgil argyfyngau a tharfu arall ar fusnes.
Meini prawf perfformiad
Mae'n rhaid eich bod chi'n gallu:
- nodi rhanddeiliaid sy’n gallu cyfrannu at gymorth â rheoli parhad busnes neu y byddent yn elwa o gymorth o’r fath
- cydweithredu â phartneriaid, rhanddeiliaid ac arbenigwyr i ddatblygu cyngor a chymorth â rheoli parhad busnes
- ystyried asesiadau risg perthnasol wrth ddatblygu rhaglenni cyngor a chymorth, yn unol â gofynion sefydliadol
- pennu ymagweddau priodol at ddatblygu galluoedd parhad busnes pobl eraill
- nodi’r adnoddau sydd eu hangen i ymgysylltu â chymorth parhad busnes
- cadarnhau rolau a chyfrifoldebau clir wrth gynorthwyo pobl eraill i ddatblygu galluoedd rheoli parhad busnes
- nodi statws a therfynau cyngor a chymorth, a chyfeirio at arbenigwr lle bo hynny’n briodol
- adolygu a diweddaru rhaglenni ar gyfer hyrwyddo parhad busnes, ac ystyried gwersi sydd wedi cael eu nodi a’u dysgu o ddigwyddiadau ac ymarferion blaenorol
Gwybodaeth a Dealltwriaeth
You need to know and understand:
- polisïau a gweithdrefnau deddfwriaethol a sefydliadol sy’n berthnasol i’ch sefydliad ar gyfer rhoi cyngor a chymorth â rheoli parhad busnes a rhannu gwybodaeth
- nodweddion gwydnwch sefydliadol a diben cynlluniau a threfniadau parhad busnes
- egwyddorion, diwylliant a chylch oes rheoli parhad busnes
- mathau o risgiau allanol a mewnol
- dulliau nodi ac ymgysylltu â rhanddeiliaid, gan gynnwys grwpiau a rhwydweithiau sy’n cynnig mynediad i’r gymuned fusnes
- sut i bennu nodweddion maes neu sector a all ddylanwadu ar y tebygolrwydd, yr effaith a’r canlyniadau i weithrediadau busnes
- rolau a strwythur fforymau ar gyfer cydweithredu ynghylch asesu risg, parodrwydd a pharhad
- rolau a chyfrifoldebau rhanddeiliaid wrth hyrwyddo parhad busnes
- dulliau o nodi anghenion a darparu cymorth i’r gymuned fusnes
- sut a pham mae’n rhaid adolygu cynlluniau parhad busnes yn systematig
- dulliau o werthuso rhaglenni ac atebolrwydd rhanddeiliaid
Cwmpas/ystod
Cwmpas Perfformiad
Gwybodaeth Cwmpas
Gwerthoedd
Ymddygiadau
Sgiliau
Geirfa
Parhad busnes
Gallu sefydliad i barhau i ddarparu cynhyrchion neu wasanaethau ar lefelau rhagddiffiniedig derbyniol yn dilyn digwyddiad sy’n tarfu.
Rheoli Parhad Busnes
Proses reoli holistig sy’n nodi bygythiadau posibl i sefydliad a’r effeithiau y gallai’r bygythiadau hynny, pe byddent yn cael eu gwireddu, eu hachosi i weithrediadau busnes. Mae’n darparu fframwaith ar gyfer meithrin gwydnwch sefydliadol a’r gallu ar gyfer ymateb effeithiol sy’n diogelu buddiannau rhanddeiliaid allweddol, enw da, brand a gweithgareddau creu gwerth.
Cynllun parhad busnes
Gweithdrefn wedi’i chofnodi, sy’n arwain sefydliadau i ymateb, adfer, ailgychwyn a dychwelyd i lefel weithredu ragddiffiniedig yn sgil tarfu.
Asesu Risgiau (dadansoddol neu ddynamig)
Y broses o nodi a gwerthuso risgiau.
Asesiad Risg Dadansoddol:
Y broses systematig o nodi, dadansoddi a gwerthuso risgiau gan ddefnyddio dulliau ac offer strwythuredig. Mae’r ymagwedd hon yn cael ei chynnal pan fydd digon o amser i gasglu a gwerthuso gwybodaeth, ac mae’n aml yn cynnwys technegau ansoddol a meintiol er mwyn sicrhau bod dealltwriaeth gynhwysfawr ar gyfer gwneud penderfyniadau.
Asesiad Risg Dynamig:
Asesu peryglon ac effeithiau yn barhaus yn ystod ymateb i ddigwyddiad. Mae’r ymagwedd hon, sy’n reddfol i raddau helaeth, yn dibynnu ar wybodaeth am y cyd-destun risg a’r profiad ohono, gan addasu yn wyneb amodau sy’n newid mewn amser real i sicrhau diogelwch ac effeithiolrwydd camau gweithredu’r ymateb.