Darparu gwasanaeth fferyllfa effeithiol ac ymatebol

Mae'r safon hon yn ymwneud â gwrando ar anghenion unigolyn a darparu gwybodaeth a chyngor a fydd yn bodloni eu gofynion, yn ogystal â delio gydag achosion o gwynion, ymholiadau a phryderon o ddydd i ddydd.

Bydd eich ymarfer yn cydweddu â'ch rôl alwedigaethol ac yn cael ei gyflawni o dan y fframweithiau rheoliadol, proffesiynol a moesegol a sefydlwyd yng nghyd-destun deddfwriaeth gyfredol. Bydd angen i chi ymdrin â'ch gwaith mewn modd adfyfyriol.

Byddwch bob amser yn gweithio oddi mewn i Weithdrefnau Gweithredu Safonol sy'n ymwneud â sut mae gwasanaeth fferyllfa'n cael ei ddarparu yn eich gweithle. Dylid mabwysiadu dull gweithredu gofalgar, tosturiol, yn unol â'r canllawiau gofal iechyd cyfredol. Bydd angen i ddefnyddwyr y safon hon sicrhau bod eu hymarfer yn adlewyrchu'r wybodaeth a'r polisïau diweddaraf.

1. cyfathrebu â'r unigolyn a phobl allweddol ar gyflymdra, mewn modd, ac ar lefel sy'n briodol ar gyfer dealltwriaeth, dewisiadau ac anghenion yr unigolyn
2. addasu i'r dulliau cyfathrebu llafar a di-eiriau a gynigir gan yr unigolyn
3. gweithio oddi mewn i'r Gweithdrefnau Gweithredu Safonol, gan gynnwys y gweithdrefnau iechyd a diogelwch perthnasol, ac oddi mewn i'ch terfynau cymhwysedd eich hun
4. casglu a dehongli gwybodaeth gan unigolion ynghylch anghenion neu bryderon penodol a all fod ganddynt
5. gofyn cwestiynau priodol i unigolion i wirio'ch dealltwriaeth o'u hanghenion neu eu pryderon, yn unol â'r Gweithdrefnau Gweithredu Safonol
6. gweithio'n annibynnol a chydag eraill i nodi anawsterau gyda systemau a gweithdrefnau er mwyn helpu i leiafu'r gwrthdaro posibl
7. nodi'r opsiynau sydd ar gael i ddatrys unrhyw faterion neu bryderon ynghylch y gwasanaeth
8. dewis yr opsiwn gorau ar gyfer yr unigolyn a'ch sefydliad
9. darparu gwybodaeth yn glir ac mewn modd y gall yr unigolyn ei ddeall, oddi mewn i derfynau eich cymhwysedd
10. awgrymu ffyrdd eraill o ddiwallu anghenion yr unigolyn, neu sut gellid ymdrin â'u pryderon, os nad ydych chi'n gallu helpu
11. trafod a chytuno ar yr opsiwn a gynigir ar gyfer ymdrin ag anghenion neu bryderon gydag unigolion
12. darparu gwybodaeth i unigolion yn rheolaidd ynghylch y broses sy'n diwallu eu hanghenion
13. gwirio gyda'r unigolion i sicrhau bod eu hanghenion wedi cael eu diwallu mewn modd sy'n eu bodloni
14. os na ellir diwallu eu hanghenion neu eu pryderon, rhoi esboniad clir i unigolion
15. lle bo unrhyw fater gofynnol y tu allan i gylch gwaith eich rôl, ei gyfeirio ymlaen at y person priodol
16. lle bo hynny'n briodol, cwblhau'r holl ddogfennau perthnasol a'u storio'n briodol, yn unol â gofynion cyfreithiol a sefydliadol

1. beth yw'r Gweithdrefnau Gweithredu Safonol a phwysigrwydd cadw atynt bob amser
2. pwysigrwydd gweithio oddi mewn i derfynau eich cymhwysedd a'ch awdurdod, pryd mae angen ceisio cytundeb neu ganiatâd pobl eraill, a phryd mae angen cyfeirio materion ymlaen at berson priodol
3. deddfwriaeth iechyd a diogelwch gyfredol a sut mae'n berthnasol i'r amgylchedd gwaith
4. gofynion cyfreithiol, sefydliadol a pholisi sy'n berthnasol i'ch rôl chi, i rôl pobl eraill yn eich sefydliad, a'r gweithgareddau sy'n cael eu cyflawni
5. y canllawiau, y polisïau a'r gweithdrefnau cenedlaethol a lleol perthnasol sydd ar gael, a sut a phryd dylid eu cyrchu
6. pwysigrwydd cadw at bolisïau llywodraethu gwybodaeth a chynnal cyfrinachedd wrth rannu gwybodaeth am unigolion gydag eraill
7. y ddyletswydd i roi gwybod am unrhyw weithredoedd neu ddiffyg gweithredu a allai fod yn niweidiol i unigolion, i chi eich hunan, i gydweithwyr neu i'ch cyflogwr
8. beth mae gwasanaeth cwsmeriaid da yn ei olygu
9. polisi'r sefydliad ar y gwasanaeth sy'n cael ei ddarparu i unigolion a sut mae hynny'n berthnasol i'ch rôl
10. gweithdrefn y sefydliad ar gyfer ymdrin â chwynion
11. dulliau o ganiatáu cyfathrebu effeithiol a chefnogi unigolion i gyfleu eu hanghenion, eu barn a'u dewisiadau
12. sut mae defnyddio mathau priodol o dechnegau holi i gasglu'r wybodaeth berthnasol
13. pwysigrwydd dangos empathi at yr unigolyn a sut mae gwneud hynny
14. yr agweddau a'r goblygiadau seicolegol, galwedigaethol a chymdeithasol ar gyfer unigolion sy'n byw gyda chyflyrau
15. sut mae cyd-drafod ag unigolion
16. terfynau'r hyn y gallwch chi a'r gwasanaeth ei gynnig i unigolion
17. pwysigrwydd casglu'r wybodaeth berthnasol am yr unigolyn a'u problem
18. pwysigrwydd cyfathrebu llafar a di-eiriau wrth gyfathrebu ag unigolion
19. sut mae rhoi gwybodaeth glir a chywir, a gwirio dealltwriaeth yr unigolyn
20. pwysigrwydd gwirio cywirdeb yr wybodaeth rydych chi wedi'i chasglu gyda'r unigolyn
21. y cynnyrch a'r gwasanaethau perthnasol y mae angen darparu gwybodaeth a/neu gyngor yn eu cylch
22. ble mae cael cymorth os na allwch chi ddarparu gwybodaeth a chyngor eich hun
23. yr wybodaeth y gallwch chi a chydweithwyr eraill ei rhoi i unigolion
24. sut mae rheoli gwrthdaro a/neu unigolion sy'n drallodus
25. sut mae asesu cwynion a pha gamau i'w cymryd
26. pryd dylech chi gyfeirio cwynion ymlaen, ac at bwy
27. pwysigrwydd cofnodi, storio ac adalw gwybodaeth, yn unol â gweithdrefnau sefydliadol

Mae'r safon hon yn cysylltu â'r dimensiwn canlynol oddi mewn i Fframwaith Gwybodaeth a Sgiliau y GIG (Hydref 2004):

Dimensiwn: Craidd 5
Ansawdd