Dylunio a gweithgynhyrchu argaeadau

Mae'r safon hon yn canolbwyntio ar ddylunio a gweithgynhyrchu, gan ddefnyddio technegau â llaw neu dechnegau digidol, argaeadau (obturators). Bwriedir i argaeadau ddisodli taflod y genau ac ardaloedd cysylltiedig, hyd at ac yn cynnwys cynnal crau'r llygad. Gall argaeadau gynnwys set o ddannedd gosod cyflawn neu rannol yn eu dyluniad a, hefyd, gallant gael eu defnyddio wrth adsefydlu unigolion y mae angen prosthesisau wynebol arnynt.

Defnyddir argaeadau i gywiro problemau cynhwynol, fel taflodau bylchog, neu ddiffygion caffaeledig, er enghraifft pan fydd meinwe wedi'i chodi oherwydd presenoldeb tiwmorau. Gall argaeadau fod yn barhaol fel y maent ar gyfer y rhan fwyaf o broblemau cynhwynol, yn rhannol barhaol neu dros dro pan fydd angen gwneud argaead yn gyflym yn dilyn llawdriniaeth frys, neu pan fydd dannedd gosod presennol unigolyn yn cael eu defnyddio fel argaead dros dro. Oherwydd cymhlethdod anghenion yr unigolyn a'r gwaith cysylltiedig, mae angen i'r technegydd weithio'n agos gydag aelodau eraill tîm iechyd y geg.

Gall argaeadau gael eu gwneud yn gyfan gwbl o ddeunyddiau polymerig, o bolymerig gyda rhai cydrannau metelig, er enghraifft mecanweithiau cloi i'w cadw yn y geg, neu gyda fframwaith aloi metelig, megis ar y cyd â mewnblaniadau deintyddol. Mae'n hanfodol bod argaeadau'n ffitio'n union i'r unigolyn, neu bydd bwyd a diod yn dianc trwy drwyn yr unigolyn. Dylai argaeadau adfer golwg naturiol o ran lliw, siâp a maint; dylent ffitio ceg yr unigolyn yn gyfforddus, dylent gael eu cadw yn eu lle yng ngheg yr unigolyn, ni ddylent ganiatáu i weddillion bwyd gronni a dylent hwyluso lleferydd. Er mwyn gweithgynhyrchu prosthesis sy'n bodloni'r gofynion esthetig a swyddogaethol hyn, bydd angen cast cywir arnoch ac, i'r graddau y bo hynny'n bosibl o ystyried natur y broblem, cofnod cywir o'r berthynas rhwng gên uwch ac is yr unigolyn.

Defnyddir y term 'cleient' i olygu'r aelod o'r tîm gofal iechyd y geg sydd wedi rhagnodi'r prosthesis a wneir yn bwrpasol. Yr unigolyn yw'r sawl y gwneir yr argaead a wneir yn bwrpasol ar ei gyfer, neu'r rhieni/gwarcheidwaid/gofalwyr lle bo hynny'n briodol. Oherwydd natur problemau iechyd y geg sy'n gofyn am ddatblygu argaeadau, bydd technolegwyr deintyddol yn tueddu i weithio'n agos gyda chleientiaid, unigolion (neu eu rhieni/gwarcheidwaid/gofalwyr fel y bo'n briodol) ac aelodau eraill y tîm gofal i'w datblygu. Mae hyn yn gofyn am sgiliau cyfathrebu da gyda phob un o'r uchod ac aelodau eraill y tîm gofal fel ei gilydd. 

Bydd angen i ddefnyddwyr y safon hon sicrhau bod ymarfer yn adlewyrchu gwybodaeth a pholisïau cyfredol.

1. cael at a dehongli'n gywir yr holl wybodaeth a chyfarwyddiadau gwaith sy'n berthnasol
2. gweithio'n ddiogel bob amser ac yn unol â'r holl ddeddfwriaeth, canllawiau, polisïau, gweithdrefnau a phrotocolau perthnasol
3. delio'n brydlon ac yn effeithiol ag unrhyw broblemau o fewn eich rheolaeth a rhoi gwybod am broblemau nad allant gael eu datrys
4. cyfathrebu â phobl eraill berthnasol yn ôl cyflymder, modd a lefel sy'n briodol i'w dealltwriaeth a'u hanghenion, a'r hyn sy'n well ganddynt
5. nodi a lleihau peryglon a risgiau yn y gweithle
6. cadarnhau pwy yw'r unigolyn yn unol â gweithdrefnau'r sefydliad
7. ennill cydsyniad gwybodus, dilys gan yr unigolyn yn unol â gweithdrefnau penodol 
8. cyfathrebu â'r unigolyn a phobl allweddol yn ôl cyflymder, modd a lefel sy'n briodol i ddealltwriaeth ac anghenion yr unigolyn, a'r hyn sy'n well ganddo
9. parchu hawliau a dymuniadau'r unigolyn yn gysylltiedig â'i breifatrwydd, ei gredoau a'i urddas
10. casglu holl wybodaeth y fanyleb ynghyd sy'n ofynnol i ddylunio a gweithgynhyrchu'r argaead
11. cadarnhau cywirdeb y fanyleb gyda phobl eraill berthnasol
12. dewis y cydrannau, y deunyddiau a'r cyfarpar angenrheidiol a chadarnhau eu bod yn addas at y diben
13. gosod y cyfarpar gweithgynhyrchu yn unol â'r fanyleb
14. gweithgynhyrchu'r argaead gan ddefnyddio dulliau a thechnegau priodol 
15. monitro'r broses weithgynhyrchu a'i haddasu fel bo'r angen 
16. tynnu neu adfer y cynnyrch wedi'i weithgynhyrchu gan ddefnyddio dull priodol sy'n rhyddhau'r eitem heb achosi difrod
17. gwirio bod y cynnyrch wedi'i weithgynhyrchu yn cyfateb i'r fanyleb a gwneud unrhyw addasiadau angenrheidiol
18. gwirio bod yr argaead gorffenedig yn cyfateb i'r fanyleb a gwneud unrhyw addasiadau angenrheidiol
19. gwaredu gwastraff yn unol â gweithdrefnau'r sefydliad
20. cwblhau a storio'r holl ddogfennaeth berthnasol yn unol â gofynion y sefydliad

1. y ddeddfwriaeth, y canllawiau, y polisïau, y gweithdrefnau a'r protocolau presennol sy'n berthnasol i'ch ymarfer yn y gwaith, ac y mae'n rhaid i chi gadw atynt
2. cwmpas a chyfyngiadau eich cymhwysedd, eich cyfrifoldebau a'ch atebolrwydd eich hun fel y bo'n berthnasol i'ch rôl
3. sut i gael at a dehongli'r holl wybodaeth a chyfarwyddiadau gwaith sy'n berthnasol
4. gweithdrefnau penodol ar gyfer rhoi gwybod am broblemau sydd y tu hwnt i'ch cymhwysedd, eich cyfrifoldebau a'ch atebolrwydd
5. y ddyletswydd i roi gwybod am unrhyw weithred neu anwaith a allai fod yn anniogel/yn niweidiol i chi neu i eraill 
6. sut i gyfathrebu â phobl eraill berthnasol yn ôl cyflymder, modd a lefel sy'n briodol i'w dealltwriaeth a'u hanghenion, a'r hyn sy'n well ganddynt
7. y peryglon a'r risgiau a allai godi wrth i chi gyflawni eich rôl a sut y gallwch eu lleihau
8. sut i addasu arddulliau cyfathrebu mewn ffyrdd sy'n briodol i anghenion yr unigolyn
9. y defnydd cywir o unrhyw gyfarpar a chyfarpar diogelu personol (PPE) i amddiffyn eich iechyd a'ch diogelwch chi a phobl eraill
10. sut i gael cadarnhad o bwy yw unigolyn yn unol â gweithdrefnau'r sefydliad
11. yr egwyddorion, yr ymarfer a'r gweithdrefnau sy'n gysylltiedig â chydsyniad gwybodus
12. egwyddorion dylunio a gweithgynhyrchu digidol, a'r defnydd ohonynt
13. cyfarpar, dulliau a thechnegau gweithgynhyrchu digidol perthnasol
14. yr anatomi ysgerbydol, ffisioleg y pen a'r gwddf a morffoleg dannedd
15. strwythur, swyddogaeth a symudiad y cyhyrau orowynebol, gan gynnwys y tafod a'r cymal arlais-fandiblol
16. anhwylderau a chlefydau sy'n effeithio ar geudod y geg
17. etioleg a dosbarthiadau camachludiadau
18. y newidiadau ffisiolegol a phatholegol sy'n gysylltiedig â'r broses heneiddio a thrawma yn gysylltiedig ag amgylchedd y geg
19. pwysigrwydd dargadw'r ligament periodontol a'r newidiadau mewn ystumganfod (proprioception) oherwydd colli'r ligament periodontol
20. heintiau'r genau a'u triniaeth
21. effeithiau afiechyd y geg ar ddyluniad a swyddogaeth prosthesisau a chyferpynnau
22. malaenedd y geg a'r rheolaeth lawfeddygol a meddygol ar falaenedd y geg
23. egwyddorion radiotherapi a chemotherapi a'u heffeithiau ar ddyluniad a swyddogaeth dyfeisiau
24. dyluniad a gwneuthuriad y ddyfais cyn-lawdriniaethol
25. effaith triniaethau ar y dewis o ddeunyddiau, dyluniad a swyddogaeth y cyferpyn a'r technegau gweithgynhyrchu; gwneuthuriad cyferpyn triniaeth radiotherapi a'r defnydd ohono
26. trin deunydd ymbelydrol
27. egwyddorion trosglwyddo meinwe, strwythur y croen, dulliau clinigol trosglwyddo meinwe, egwyddorion dylunio cyferpynnau a ddefnyddir wrth drosglwyddo meinwe 
28. adferiad llawdriniaethol
29. anatomi a ffisioleg ôl-driniaeth
30. y ffactorau ehangach (cymdeithasegol, ymddygiadol, amgylcheddol ac economaidd) sy'n cyfrannu at iechyd a salwch y geg
31. anghenion corfforol ac ymarferol yr unigolyn o ran colli meinwe feddal yng ngheudod y geg
32. yr ymateb emosiynol gan yr unigolyn a phobl agos at yr unigolyn o ran colli meinwe feddal a dannedd

33. rôl argaeadau wrth adfer a chynnal a chadw:

    • meinweoedd
    • ategiad meinweoedd
    • estheteg
    • seineg
    • swyddogaeth achludiad a'r cymal arlais-fandiblol 

34. pwysigrwydd adfer a chynnal y dimensiwn fertigol achludol

35. buddion a chyfyngiadau ailosod meinwe yn syth wrth ddarparu prosthesisau symudadwy
36. y defnydd o brosthesisau symudadwy dros dro a'r angen amdanynt
37. y defnydd o leininau hydwyth a chyflyryddion meinwe
38. cyfyngiadau dylunio tandoriadau blaen mawr a chyflyrau deintyddol sydd eisoes yn bodoli

39. egwyddorion ac ymarfer:

    • dargadwad a sefydlogrwydd
    • estheteg a seineg
    • argysylltiad

40. egwyddorion dyluniad argaead

41. dosbarthiad ac isddosbarthiad deunyddiau ar sail cyfansoddiad cemegol a strwythur mewnol
42. priodweddau mecanyddol, ffisegol, thermol, cemegol a biolegol deunyddiau
43. cynnyrch ar gyfer gweithgynhyrchu castiau a mowldiau
44. cwyrau a ddefnyddir wrth weithgynhyrchu prosthesisau symudadwy
45. polymerau deintyddol
46. nodweddion strwythurol cadwyni polymer
47. polymerau sylfaen dannedd gosod
48. aloiau deintyddol
49. deunyddiau dannedd artiffisial
50. deunyddiau argraff, dyblygu a glanhau
51. mewnblanoleg ac oseointegreiddio
52. deunyddiau gwrthsafol
53. dulliau o ddatblygu, cynnal a gwella cyfathrebu a gwybodaeth yn gysylltiedig â darparu dyfeisiau deintyddol a wnaed yn bwrpasol
54. dulliau o amddiffyn rhag halogiad a rheoli heintiau wrth drin argraffau sy'n dod i law ac eitemau eraill a fuodd, efallai, yn y geg neu y bwriedir eu rhoi yn y geg; pam mae'n bwysig gwneud hynny 
55. egwyddorion sicrhau ansawdd, gan gynnwys cofnodi a samplu yn effeithiol; prosesau a gweithdrefnau ar gyfer sicrhau ansawdd yn eich gweithle
56. dulliau o osod a graddnodi cyfarpar a phrofi bod hyn yn gywir
57. effeithiau addasu cynnyrch gweithgynhyrchwyr i fodloni gofynion y labordy ar briodweddau ffisegol cynnyrch ac ar gynnyrch y mae eu hansawdd wedi'i sicrhau, a goblygiadau cyfreithiol gweithgynhyrchu gwael
58. yr amrywiaeth o gyfarpar a ddefnyddir i ddylunio a gweithgynhyrchu dyfeisiau deintyddol
59. dulliau o ddefnyddio cyfarpar a deunyddiau yn ddiogel, gan gynnwys defnyddio cemegion a sylweddau peryglus eraill 
60. dulliau o storio cyfarpar a deunyddiau gwahanol yn ddiogel
61. dulliau glanhau a chynnal a chadw gwahanol fathau o gyfarpar
62. sut i gael gwared ar wastraff yn unol â gweithdrefnau'r sefydliad
63. sut i gwblhau'r holl ddogfennaeth berthnasol yn unol â gofynion y sefydliad, a'i storio'n ddiogel