Dylunio a gweithgynhyrchu prosthesisau symudadwy cyflawn

Mae'r safon hon yn canolbwyntio ar ddylunio a gweithgynhyrchu prosthesisau symudadwy cyflawn – dannedd gosod polymerig a wnaed gan ddefnyddio technegau â llaw neu dechnegau digidol. Mae'r rhain yn ddyfeisiau deintyddol a wneir yn bwrpasol i ffitio siâp ceg unigryw'r unigolyn ac sy'n disodli'r set gyflawn o ddannedd uchaf a/neu isaf. Gall y prosthesis gynnwys amrywiaeth o ffactorau gan gynnwys, ond heb fod yn gyfyngedig i'r canlynol: 

• dull dargadw
• estheteg, gan gynnwys creu trosblat
• gradd yr achludiad, gan gynnwys defnyddio trosgaenau, gorfrathiad dwfn
• y gofyniad am fân argáu
• cysylltion sy'n cael eu cynnal gan fewnblaniadau.

Gall y prosthesisau symudadwy fod yn newydd, disodli hen rai, yn rhai parod neu'n rhai dyblyg a gallant gynnwys leininau hydwyth. Mae angen i chi ddylunio a gweithgynhyrchu prosthesis enghreifftiol, addasu'r rhain lle bo'r angen ar ôl defnyddio'r dannedd gosod ar brawf ac yna gweithgynhyrchu a gorffen y prosthesis symudadwy cyflawn terfynol.

Defnyddir y term 'cleient' i olygu'r aelod o'r tîm gofal iechyd y geg sydd wedi rhagnodi'r prosthesis a wneir yn bwrpasol. Gall cleientiaid ddod o'r tu allan i'r sefydliad (fel labordai eraill, ymarferwyr deintyddol, ysgolion hyfforddi) neu gallant fod yn fewnol (mewn ysbyty deintyddol). Yr unigolyn yw'r sawl y gwneir y ddyfais ddeintyddol a wneir yn bwrpasol ar ei gyfer.

Bydd angen i ddefnyddwyr y safon hon sicrhau bod ymarfer yn adlewyrchu gwybodaeth a pholisïau cyfredol.

1. cael at a dehongli'n gywir yr holl wybodaeth a chyfarwyddiadau gwaith sy'n berthnasol
2. gweithio'n ddiogel bob amser ac yn unol â'r holl ddeddfwriaeth, canllawiau, polisïau, gweithdrefnau a phrotocolau perthnasol
3. delio'n brydlon ac yn effeithiol ag unrhyw broblemau o fewn eich rheolaeth a rhoi gwybod am broblemau nad allant gael eu datrys
4. nodi a lleihau peryglon a risgiau yn y gweithle
5. cyfathrebu â phobl eraill berthnasol yn ôl cyflymder, modd a lefel sy'n briodol i'w dealltwriaeth a'u hanghenion, a'r hyn sy'n well ganddynt
6. casglu holl wybodaeth y fanyleb ynghyd sy'n ofynnol i ddylunio a gweithgynhyrchu'r prosthesisau symudadwy cyflawn
7. cadarnhau cywirdeb y fanyleb gyda phobl eraill berthnasol
8. dewis y cydrannau, y deunyddiau a'r cyfarpar angenrheidiol a chadarnhau eu bod yn addas at y diben
9. gosod y cyfarpar gweithgynhyrchu yn unol â'r fanyleb
10. gweithgynhyrchu'r prosthesisau symudadwy cyflawn gan ddefnyddio dulliau a thechnegau priodol
11. monitro'r broses weithgynhyrchu a'i haddasu, fel y bo angen
12. tynnu neu adfer y cynnyrch wedi'i weithgynhyrchu gan ddefnyddio dull priodol sy'n rhyddhau'r eitem heb achosi difrod
13. gwirio bod y cynnyrch wedi'i weithgynhyrchu yn cyfateb i'r fanyleb a gwneud unrhyw addasiadau angenrheidiol
14. gwaredu gwastraff yn unol â gweithdrefnau'r sefydliad
15. cwblhau a storio'r holl ddogfennaeth berthnasol yn unol â gofynion y sefydliad

1. y ddeddfwriaeth, y canllawiau, y polisïau, y gweithdrefnau a'r protocolau presennol sy'n berthnasol i'ch ymarfer yn y gwaith, ac y mae'n rhaid i chi gadw atynt
2. cwmpas a chyfyngiadau eich cymhwysedd, eich cyfrifoldebau a'ch atebolrwydd eich hun fel y bo'n berthnasol i'ch rôl 
3. sut i gael at a dehongli'r holl wybodaeth a chyfarwyddiadau gwaith sy'n berthnasol 
4. gweithdrefnau penodol ar gyfer rhoi gwybod am broblemau sydd y tu hwnt i'ch cymhwysedd, eich cyfrifoldebau a'ch atebolrwydd
5. sut i gyfathrebu â phobl eraill berthnasol yn ôl cyflymder, modd a lefel sy'n briodol i'w dealltwriaeth a'u hanghenion, a'r hyn sy'n well ganddynt
6. y ddyletswydd i roi gwybod am unrhyw weithred neu anwaith a allai fod yn anniogel/yn niweidiol i chi neu i eraill
7. y peryglon a'r risgiau a allai godi wrth i chi gyflawni eich rôl a sut y gallwch eu lleihau
8. y defnydd cywir o unrhyw gyfarpar a chyfarpar diogelu personol (PPE) i amddiffyn eich iechyd a'ch diogelwch chi a phobl eraill
9. egwyddorion dylunio a gweithgynhyrchu digidol, a'r defnydd ohonynt
10. cyfarpar, dulliau a thechnegau gweithgynhyrchu digidol
11. yr anatomi ysgerbydol, ffisioleg y pen a'r gwddf a morffoleg dannedd
12. strwythur, swyddogaeth a symudiad y cyhyrau orowynebol, gan gynnwys y tafod a'r cymal arlais-fandiblol
13. anhwylderau a chlefydau sy'n effeithio ar geudod y geg
14. etioleg a dosbarthiadau camachludiadau
15. y newidiadau ffisolegol a phatholegol sy'n gysylltiedig â'r broses heneiddio a thrawma yn gysylltiedig ag amgylchedd y geg
16. pwysigrwydd dargadw'r ligament periodontol a'r newidiadau mewn ystumganfod (proprioception) oherwydd colli'r ligament periodontol
17. y ffactorau ehangach (cymdeithasegol, ymddygiadol, amgylcheddol ac economaidd) sy'n cyfrannu at iechyd a salwch y geg
18. yr ymateb emosiynol gan yr unigolyn i golli dannedd

19. rôl prosthesisau symudadwy wrth adfer a chynnal a chadw:

    • ategiad meinweoedd
    • estheteg
    • seineg
    • swyddogaeth achludiad a'r cymal arlais-fandiblol

20. pwysigrwydd adfer a chynnal a chadw'r dimensiwn fertigol achludol

21. buddion a chyfyngiadau ailosod dannedd yn syth wrth ddarparu prosthesisau symudadwy
22. buddion a chyfyngiadau cadw adeileddau gwreiddiau wrth ddarparu prosthesisau symudadwy
23. y defnydd o brosthesisau symudadwy dros dro
24. diben leininau hydwyth a chyflyryddion meinwe, a'r defnydd ohonynt; effaith yr amgylchedd in vivo ar berfformiad hirdymor leininau; halogiad microbaidd leininau, effaith topograffeg arwyneb ar berfformiad in vivo
25. cyfyngiadau dylunio tandoriadau blaen mawr a chyflyrau deintyddol sydd eisoes yn bodoli
26. defnyddio mesurydd deintyddol a nodi tandoriadau defnyddiadwy ac annefnyddiadwy yn nyluniad y dannedd gosod rhannol a gosodiad y gafaelyn

27. egwyddorion ac ymarfer:

    • dargadwad a sefydlogrwydd
    • estheteg a seineg
    • argysylltiad 

28. dosbarthiad ac isddosbarthiad deunyddiau ar sail cyfansoddiad cemegol a strwythur mewnol

29. priodweddau mecanyddol, ffisegol, thermol, cemegol a biolegol deunyddiau
30. cynnyrch ar gyfer gweithgynhyrchu castiau a mowldiau
31. cwyrau neu ddefnyddiau tebyg a ddefnyddir wrth weithgynhyrchu prosthesisau symudadwy
32. polymerau deintyddol
33. nodweddion strwythurol cadwyni polymer:
34. polymerau sylfaen dannedd gosod
35. deunyddiau dannedd artiffisial
36. deunyddiau argraff, dyblygu a glanhau
37. dulliau o ddatblygu, cynnal a gwella cyfathrebu a gwybodaeth yn gysylltiedig â darparu dyfeisiau deintyddol a wnaed yn bwrpasol
38. dulliau o reoli haint wrth drin argraffau sy'n dod i law ac eitemau eraill a fuodd, efallai, yn y geg neu y bwriedir eu rhoi yn y geg
39. egwyddorion sicrhau ansawdd, gan gynnwys cofnodi a samplu yn effeithiol; prosesau a gweithdrefnau ar gyfer sicrhau ansawdd yn eich gweithle
40. dulliau o osod a graddnodi cyfarpar a phrofi bod hyn yn gywir
41. effeithiau addasu cynnyrch gweithgynhyrchwyr i fodloni gofynion y labordy ar briodweddau ffisegol cynnyrch ac ar gynnyrch y mae eu hansawdd wedi'i sicrhau, a goblygiadau cyfreithiol gweithgynhyrchu gwael
42. yr amrywiaeth o gyfarpar a ddefnyddir i ddylunio a gweithgynhyrchu dyfeisiau deintyddol
43. dulliau o ddefnyddio cyfarpar a deunyddiau yn ddiogel, gan gynnwys defnyddio cemegion a sylweddau peryglus eraill
44. dulliau o storio cyfarpar a deunyddiau gwahanol yn ddiogel
45. dulliau glanhau a chynnal a chadw gwahanol fathau o gyfarpar
46. sut i gael gwared ar wastraff yn unol â gweithdrefnau'r sefydliad
47. sut i gwblhau'r holl ddogfennaeth berthnasol yn unol â gofynion y sefydliad, a'i storio'n ddiogel