Rheoli gweithrediadau coedyddiaeth

Mae’r safon hon yn ymwneud â’r holl weithgareddau a all fod yn ofynnol i reoli gweithrediadau coedyddiaeth.

Gallai gweithgareddau gynnwys rheoli rhai neu’r cyfan o’r canlynol:

• datblygu cynlluniau coedyddiaeth
• cydlynu adnoddau priodol
• monitro’r broses o weithredu cynlluniau coedyddiaeth
• gwirio ansawdd gwaith coedyddiaeth

Gallech fod yn gweithio yn unol â manyleb a roddwyd sy’n diffinio’r dulliau i’w defnyddio, ond bydd disgwyl i chi benderfynu sut i reoli’r gwaith ar y safle.

Bydd angen i chi ystyried unrhyw gyfyngiadau sy’n effeithio ar y gwaith, e.e. safleoedd dynodedig, presenoldeb strwythurau rhestredig, bywyd gwyllt, rhywogaethau estron goresgynnol neu rywogaethau gwarchodedig, ac ati.

Mae’n ofynnol i chi osgoi neu leihau difrod i, neu darfu ar, yr ardal gyfagos, gan gynnwys coed, llystyfiant arall, bywyd gwyllt a chynefinoedd, neu i unrhyw strwythurau, ffensys, llwybrau, arwyddion, ffosydd/dyfrffyrdd neu ddraeniau, ac i sicrhau nad yw eich gwaith yn peri risg i ddefnyddwyr eraill y safle.

Mae’n rhaid bod unrhyw un sy’n gweithio gyda chyfarpar a pheiriannau fod wedi’u hyfforddi’n briodol, yn gymwys i gyflawni’r gweithgaredd a wneir, a dal ardystiad cyfredol, lle bo angen, yn unol â’r ddeddfwriaeth berthnasol.

Mae’n rhaid i’ch gwaith gydymffurfio â’r holl ddeddfwriaeth, codau ymarfer, safonau’r diwydiant a chanllawiau perthnasol wrth reoli’r gwaith hwn.

Mae’r safon hon i’r rhai sy’n gyfrifol am reoli gweithrediadau coedyddiaeth.

Gofynion a chyfrifoldebau craidd
1. cael y wybodaeth berthnasol i reoli gweithrediadau coedyddiaeth a chadarnhau’r rhaglenni gwaith gyda’r bobl berthnasol, yn unol â gweithdrefnau sefydliadol
2. gwirio unrhyw ofynion statudol a allai fod ar waith a all atal neu osod amodau ar y gwaith i’w gyflawni a chadarnhau bod pob caniatâd a thrwydded ofynnol wedi’i sicrhau
3. cadarnhau bod asesiad amgylcheddol o’r safle yn cael ei gyflawni cyn dechrau gweithio ac ystyried y canfyddiadau
4. cynnal eich iechyd a’ch diogelwch eich hun ac iechyd a diogelwch pobl eraill bob amser, yn unol â’r ddeddfwriaeth a chodau ymarfer perthnasol
5. asesu’r risgiau sy’n gysylltiedig â’r safle a’r gwaith sydd i’w gyflawni, gan gynnwys peryglon tanddaearol ac uwchben, a chynhyrchu asesiadau risg a datganiadau dull, fel bo angen
6. ystyried effaith clefydau, diffygion a dirywiad ar y gwaith coed a chael cyngor proffesiynol lle nad ydych chi’n sicr
7. cadarnhau bod camau rheoli digonol wedi’u rhoi ar waith a bod cynllunio a gweithdrefnau brys sy’n berthnasol i’r safle wedi’u sefydlu a’u cofnodi
8. monitro bioddiogelwch yn unol â gofynion cyfreithiol perthnasol, canllawiau’r diwydiant a gweithdrefnau sefydliadol
9. cadarnhau bod gweithdrefnau ar gyfer symud a gwaredu pob deunydd gwastraff a deunydd dros ben yn eu lle yn unol â gofynion cyfreithiol a gweithdrefnau sefydliadol, a sicrhau bod y rhain yn cael eu dilyn
10. cydlynu gwasanaethau a gweithgareddau’r safle a defnyddio’r dulliau priodol i gyfathrebu’n effeithiol â’r gweithlu ac unrhyw un arall sy’n ymwneud â’r gwaith, neu y mae’r gwaith yn effeithio arnynt, yn unol â chanllawiau’r diwydiant a gweithdrefnau sefydliadol
11. cadarnhau bod difrod i’r safle a’r ardal gyfagos, neu darfu arnynt, yn cael eu lleihau wrth wneud y gwaith hwn a chadarnhau bod y safle’n cael ei adael mewn cyflwr diogel a thaclus
12. gweithredu agweddau arfer gorau at gynaliadwyedd sy’n briodol i’r gwaith sy’n cael ei gyflawni
13. delio’n effeithiol â phroblemau sy’n codi o fewn cwmpas a chyfyngiadau eich cyfrifoldebau eich hun a rhoi gwybod am broblemau na ellir eu datrys, yn unol â gweithdrefnau sefydliadol
14. cwblhau a storio’r holl ddogfennaeth berthnasol yn unol â gofynion cyfreithiol perthnasol a gweithdrefnau sefydliadol
Datblygu a gweithredu cynlluniau ar gyfer gweithrediadau coedyddiaeth
1. datblygu cynlluniau coedyddiaeth i gyflawni’r deilliannau gofynnol yn unol â’r wybodaeth a ddarparwyd ac asesiadau risg
2. dewis y dulliau gweithio mwyaf diogel, gan ddefnyddio dulliau mecanyddol, lle bo hynny’n fwy diogel, yn unol â’r risgiau a aseswyd a gweithdrefnau sefydliadol
3. nodi a chasglu’r adnoddau sy’n ofynnol i gyflawni deilliannau’r gweithrediadau coedyddiaeth, yn unol â chynlluniau
4. dyrannu cyfrifoldebau i’r gweithlu am eu rhan yn y gweithrediadau coedyddiaeth
5. cadarnhau bod gan holl aelodau’r gweithlu’r hyfforddiant, y sgiliau, y cymhwysedd a’r ardystiad perthnasol i gyflawni’r gwaith, yn unol â gofynion cyfreithiol
6. wrth ddefnyddio contractwyr, cadarnhau bod yr yswiriant perthnasol ar waith
7. cyfleu’r wybodaeth a’r cyfrifoldebau perthnasol am ddiogelwch a gwybodaeth gysylltiedig â gwaith i’r gweithlu yn unol â gweithdrefnau sefydliadol, a monitro bod gweithdrefnau diogelwch yn cael eu dilyn
8. cadarnhau bod y cyfarpar diogelu personol (PPE) priodol ar gyfer y gwaith i’w gyflawni yn cael ei wisgo drwy’r amser
9. cadarnhau bod y deunyddiau a’r cyfarpar sy’n ofynnol ar gyfer y gwaith ar gael a’u bod yn addas at eu diben
10. rheoli diogelwch a diogeledd cyfarpar a pheiriannau ar y safle
11. monitro’r gweithrediadau coedyddiaeth yn erbyn y cynlluniau o ran amserlen, ansawdd, cost, canlyniadau a’r safon a gyflawnir
12. rheoli unrhyw wyriadau o’r cynlluniau coedyddiaeth

Gofynion a chyfrifoldebau craidd
1. sut i gael at wybodaeth sy’n berthnasol i’r gweithrediadau coedyddiaeth a’i dehongli
2. pwysigrwydd cynnal asesiad amgylcheddol o’r safle cyn dechrau gweithio a’r canfyddiadau y mae’n rhaid eu hystyried
3. eich cyfrifoldebau o dan y ddeddfwriaeth a chodau ymarfer iechyd a diogelwch perthnasol
4. sut i nodi peryglon ac asesu’r risgiau sy’n gysylltiedig â’r safle a’r gwaith i’w wneud a sut i gynhyrchu asesiadau risg a datganiadau dull ar gyfer gweithrediadau coedyddiaeth
5. pwysigrwydd gwirio iechyd coed, effaith clefydau, diffygion a dirywiad ar weithrediadau coedyddiaeth, a ble i gael cyngor proffesiynol, pan fydd angen
6. y camau rheoli iechyd a diogelwch a’r Systemau Gweithio Diogel perthnasol, a’r cynllunio a gweithdrefnau brys sy’n berthnasol i’r safle
7. y defnydd cywir o arwyddion rhybudd a rhwystrau i hysbysu ac amddiffyn pobl eraill tra bydd y gwaith yn cael ei gyflawni a’r gweithdrefnau ar gyfer rheoli traffig dros dro, lle bydd angen
8. y ddeddfwriaeth a’r codau ymarfer, safonau a chanllawiau’r diwydiant, polisïau, gweithdrefnau a phrotocolau sefydliadol, moeseg busnes a moeseg proffesiynol presennol sy’n berthnasol i’ch maes gwaith ac y mae’n rhaid i chi gadw atynt
9. pwysigrwydd mesurau bioddiogelwch a sut i sicrhau eu bod yn cael eu cymhwyso
10. y gofynion cyfreithiol a’r gweithdrefnau sefydliadol ar gyfer symud a gwaredu pob math o wastraff
11. sut i gydlynu gwasanaethau a gweithgareddau’r safle a chyfathrebu’n effeithiol â’r gweithlu ac unrhyw un arall sy’n ymwneud â’r gwaith, neu y mae’r gwaith yn effeithio arnynt, a’r dulliau cyfathrebu y dylid eu defnyddio
12. effaith bosibl y gwaith ar y safle a’r ardal gyfagos a sut i reoli a lleihau effaith y gweithrediadau coedyddiaeth ar yr amgylchedd a bioamrywiaeth
13. eich cyfrifoldeb chi a chyfrifoldeb y sefydliad am amddiffyn yr amgylchedd a gweithio’n gynaliadwy
14. y problemau a all godi wrth reoli gweithrediadau coedyddiaeth, y camau i’w cymryd a’r gweithdrefnau sefydliadol ar gyfer rhoi gwybod am broblemau na ellir eu datrys
15. cwmpas a chyfyngiadau eich cymhwysedd, eich cyfrifoldebau a’ch atebolrwydd
16. y gofynion cyfreithiol a sefydliadol ar gyfer cwblhau a storio dogfennaeth
Datblygu a gweithredu cynlluniau ar gyfer gweithrediadau coedyddiaeth
17. egwyddorion datblygu cynlluniau coedyddiaeth a beth dylent ei gynnwys
18. yr adnoddau sy’n ofynnol i weithredu cynlluniau coedyddiaeth a sut i’w casglu
19. sut i ddyrannu cyfrifoldebau i’r gweithlu a beth dylid ei ystyried
20. pwysigrwydd gwirio bod gan holl aelodau’r gweithlu, gan gynnwys y rhai nad ydynt yn cael eu cyflogi’n uniongyrchol, yr hyfforddiant, y sgiliau, y cymhwysedd a’r ardystiad perthnasol i gyflawni’r gwaith
21. sut i gael y deunyddiau a’r cyfarpar ar gyfer y gwaith a sut i sicrhau eu bod yn addas at eu diben ac ar gael, lle a phan fydd angen
22. y dulliau a’r technegau rheoli ar gyfer gweithredu a monitro cynlluniau coedyddiaeth a delio ag unrhyw wyriadau

Gallai gwybodaeth sy’n ofynnol i reoli gweithrediadau coedyddiaeth gynnwys:

• lluniadau
• cynlluniau
• amserlenni
• manylebau
• datganiadau dull
• Gweithdrefnau Gweithredu Safonol (SOPs)
• cyfarwyddiadau’r gwneuthurwr
• gofynion y cwsmer
• gofynion sicrhau ansawdd
• safonau’r diwydiant (e.e. Safonau Prydeinig)
• cyfarwyddiadau ar lafar neu yn ysgrifenedig
• canllawiau’r diwydiant (e.e. FISA)

Mae gweithdrefnau sefydliadol yn cyfeirio at weithdrefnau sydd wedi’u gosod gan y sefydliad sy’n eich cyflogi neu’r sefydliad rydych chi’n gwneud y gwaith ar ei ran (y cleient neu’r cwsmer)

System Weithio Ddiogel (SSoW) – dyma ddull gweithio sy’n rhoi mesurau rheoli ar waith sy’n deillio o asesiad risg, er mwyn rheoli peryglon a nodwyd, a rhennir y mesurau hyn yn bedair elfen: person diogel; cyfarpar diogel; lle diogel; ac arfer diogel.

Gallai’r gweithlu gynnwys:

• aelodau tîm
• gweithwyr dros dro
• staff asiantaeth
• gwirfoddolwyr
• contractwyr
• unrhyw gyfuniad o’r rhain