Torri coed sydd wedi’u dadwreiddio neu eu chwythu gan y gwynt, gan ddefnyddio llif gadwyn

Mae’r safon hon yn ymwneud â thorri coed sydd wedi’u dadwreiddio neu eu chwythu gan y gwynt, gan ddefnyddio llif gadwyn, lle y cytunwyd yn dilyn asesiad risg fod hyn yn ddull diogel. Mae’n cynnwys coed sydd wedi cael eu chwythu gan y gwynt neu eu dadwreiddio oherwydd difrod storm, symudiad y tir neu gyfrwng ffisegol arall. Ni fydd y coed mewn safle sy’n gofyn am gymorth gan y gwasanaethau brys na chwmnïau cyfleustodau.

Bydd angen cynllunio i gwblhau’r gwaith ar nifer o safleoedd wedi’u chwythu gan y gwynt, a gall y gwaith gynnwys torri a thynnu coed sydd wedi’u chwythu’n rhannol a’u torri gan y gwynt, cyn torri platiau gwreiddiau o gyffion wedi’u chwythu’n llwyr.

Gall y coed fod uwchlaw ac islaw hyd bar llithro mewn diamedr a gallant fod wedi’u dadwreiddio yn llawn ac yn rhannol. Mae hyn hefyd yn cynnwys torri’r platiau gwreiddiau sy’n hongian dros safle torri gweithredwr y llif gadwyn, gan ddefnyddio dull mecanyddol neu beiriant priodol arall i’w hatal.

Mae’r safon hefyd yn cynnwys torri coed sydd wedi’u chwythu’n rhannol (sy’n gwyro) a chwympo coed sydd wedi’u torri gan wynt, p’un a fydd y brig ynghlwm ai peidio.

Gall fod angen winshis neu beiriannau priodol eraill i atal coed â thensiwn ar yr ochr neu lle mae’r cyff yn debygol o rolio.

Mae’n ofyniad bod gweithredwyr sy’n ymgymryd â thorri coed sydd wedi’u dadwreiddio neu eu chwythu gan y gwynt fod wedi’u paratoi’n dda a bod ganddynt y cymwysterau a’r profiad priodol.

Wrth weithio gyda pheiriannau, mae’n rhaid eich bod wedi’ch hyfforddi’n briodol, a bod gennych dystysgrifau cyfredol, lle bo gofyn amdanynt, yn unol â’r ddeddfwriaeth berthnasol.

Mae’n rhaid i’ch gwaith gydymffurfio â phob deddfwriaeth berthnasol a chanllawiau presennol diwydiant.

1. asesu’r risgiau sy’n gysylltiedig â’r safle a’r gwaith arfaethedig
2. dewis a gweithredu’r dulliau gweithio mwyaf diogel, gan ddefnyddio dulliau mecanyddol lle y bo hyn yn fwy diogel, yn unol â’r risgiau a aseswyd
3. dewis a defnyddio’r cyfarpar diogelu personol (PPE) priodol ar gyfer y gwaith
4. gwerthuso eich cymhwysedd eich hun i fwrw ymlaen â’r gweithrediadau a cheisio cyngor, lle y bo angen
5. gwirio bod yr holl gyfarpar gofynnol wedi’i baratoi a’i fod yn gweithio’n iawn, yn unol â’r ddeddfwriaeth berthnasol
6. cynllunio ymagwedd systematig at y gwaith o dorri coed sydd wedi’u dadwreiddio neu eu chwythu gan y gwynt i sicrhau diogelwch gweithredwyr
7. dilyn canllawiau presennol diwydiant i gyflawni’r gweithgareddau sy’n ofynnol i dorri coed sydd wedi’u dadwreiddio a’u chwythu gan y gwynt
8. cynnal cyfathrebu a gwaith tîm effeithiol trwy gydol y gweithrediadau
9. paratoi’r safle trwy waredu malurion a rhwystrau sy’n tarfu ar yr ardal waith a sefydlu llwybr dianc
10. paratoi’r cyffion trwy waredu canghennau, llystyfiant dringo, prysg a rhwystrau eraill, lle bo’r gofyn, yn unol â chanllawiau presennol diwydiant
11. nodi tensiwn a chywasgu mewn cyffion ac addasu dulliau gweithio i gyfrif am hyn, yn unol â chanllawiau presennol diwydiant, gan ddefnyddio cyfarpar atal addas, lle y bo gofyn
12. nodi pren marw, canghennau anniogel a brigau tor yn y coed sydd wedi’u chwythu gan wynt sydd i’w torri, ac mewn coed gerllaw sy’n sefyll
13. torri’r platiau gwreiddiau o gyffion sydd o dan a thros diamedr bar llithro gan ddefnyddio’r toriadau cywasgu a thensiwn priodol, yn unol â chanllawiau presennol diwydiant, gan ddefnyddio cyfarpar atal addas, lle y bo gofyn
14. gwirio bod y coed a’r platiau gwreiddiau mewn safle a chyflwr diogel a phriodol i alluogi’r gweithrediadau dilynol
15. dewis a defnyddio cyfarpar i atal y goeden, sy’n briodol i faint a chyflwr y goeden a’r plât gwreiddiau
16. dilyn arfer da amgylcheddol fel y mae eich sefydliad a’r diwydiant wedi’i osod, a lleihau difrod amgylcheddol
17. cynnal eich iechyd a’ch diogelwch eich hun, ac iechyd a diogelwch pobl eraill bob amser, yn unol â’r ddeddfwriaeth berthnasol

1. sut i nodi peryglon ac asesu risgiau a sut i ddehongli asesiadau risg
2. pryd fyddai’n fwy diogel defnyddio dull mecanyddol i glirio’r hyn a chwythwyd gan wynt
3. peryglon gweithio ar goed sydd wedi’u difrodi neu goed sydd â chlefyd, a’r rhagofalon y mae’n rhaid eu cymryd
4. dewis, defnyddio a gofalu am gyfarpar diogelu personol (PPE)
5. y cyfarpar sy’n ofynnol i gyflawni’r gweithrediad a phwysigrwydd gwirio ei fod wedi’i baratoi ac yn gweithio’n iawn
6. sut i gynllunio ymagwedd systematig at y gwaith o dorri coed sydd wedi’u dadwreiddio neu eu chwythu gan y gwynt i sicrhau diogelwch gweithredwyr a’r ffactorau sydd angen eu hystyried
7. pwysigrwydd dilyn canllawiau presennol diwydiant wrth glirio coed sydd wedi’u chwythu gan y gwynt
8. sut i gyflawni’r gweithgareddau sy’n ofynnol i dorri coed sydd wedi’u dadwreiddio a’u chwythu gan y gwynt
9. pwysigrwydd cynnal cyfathrebu effeithiol gyda gweithredwyr ac eraill ar y safle wrth glirio coed sydd wedi’u chwythu gan y gwynt
10. pwysigrwydd dewis a chlirio llwybr dianc addas
11. sut i adnabod tensiwn a chywasgu ar y brig, y gwaelod a’r ochr mewn pren
12. y risgiau sy’n gysylltiedig a’r rhagofalon y mae angen i weithredwr y llif gadwyn eu cymryd wrth dorri pren sydd o dan densiwn uchel
13. sut i adnabod pryd mae angen winsh neu gyfarpar atal arall
14. y gwahanol fathau o winsh a chyfarpar atal arall a sut i ddewis, gosod a defnyddio winshis a chyfarpar ategol i gyflawni gwahanol dasgau yn ddiogel
15. y peryglon a allai ddigwydd wrth ddefnyddio cyfarpar atal
16. y sefyllfaoedd pan y byddai banciwr yn cael ei ddefnyddio a’r dull cyfathrebu â’r gweithredwr
17. y dulliau o dorri coed sydd wedi’u dadwreiddio, o dan ac uwchlaw hyd bar llithro mewn diamedr
18. sut i wneud platiau gwreiddiau yn ddiogel ar ôl eu torri
19. sut i adnabod sefyllfaoedd pan nad yw torri â llif gadwyn yn briodol
20. effaith bosibl eich gwaith ar yr amgylchedd a sut y gellir ei lleihau
21. eich cyfrifoldebau o dan y ddeddfwriaeth amgylcheddol a’r ddeddfwriaeth iechyd a diogelwch berthnasol

Sut i gyflawni’r canlynol:
·        torri pren o dan densiwn uchel
·        defnyddio winsh neu gyfarpar atal arall ar gyfer tensiwn ochr neu i atal pren rhag rolio/symud ar lethr
·        defnyddio winshis i atal platiau gwreiddiau sy’n hongian dros y safle
·        dewis a defnyddio pwyntiau angori sy’n ddigonol ar gyfer y pwysau sy’n cael eu hychwanegu
·        torri “boncyff hir” wrth dorri cyffiau sydd wedi’u claddu neu blatiau gwreiddiau ansefydlog
·        defnyddio toriadau “V” a dulliau eraill i dorri pren sydd o dan densiwn uchel iawn
·        torri coed sydd wedi’u dadwreiddio’n rhannol neu eu chwythu’n rhannol gan y gwynt
·        cwympo coed toredig sydd â’r brig ynghlwm neu goed heb frig arnynt

Bydd cyfarpar ategol sy’n gydnaws â’r winsh, ac ati, yn cynnwys ceblau, stropiau, tagwyr, gefynnau, blociau cipio pwli a dyfeisiau eraill, fel clampiau estyniad i gebl

Banciwr – unigolyn sy’n cadw golwg allan