Cyflawni gweithrediadau nad ydynt yn rhai foltedd uchel ar, ger neu gyda cherbyd trydan

Mae’r safon hon ar gyfer pobl sy’n gweithio ar, ger neu gyda cherbydau trydan, ond nad ydynt yn gweithio ar system foltedd uchel y cerbyd. Mae enghreifftiau o rolau perthnasol yn cynnwys technegwyr gweithdy cyrff ceir, technegwyr ffenestri ceir, technegwyr ffit cyflym cerbydau, profwyr MOT, staff gwerthu, glanhawyr/gofal ceir neu ffitwyr cerbydau. Mae’r safon yn ymwneud ag arferion gweithio diogel a gwybodaeth hanfodol am y peryglon sy’n gysylltiedig â cherbydau trydan a’r rhagofalon i’w dilyn i osgoi’r peryglon hyn.
 
At ddibenion y safon hon, cerbyd trydan yw unrhyw gerbyd sy’n cael ei yrru’n rhannol neu’n gyfan gwbl gan drydan. Byddai hyn yn cynnwys:
 
•     Hybrid (HEV) – yn cynnwys cerbydau hybrid ysgafn/micro lle’r ystyrir bod y foltedd yn beryglus.
•     Hybrid Plygio i Mewn (PHEV)
•     Cerbyd Trydan Pellter Estynedig (ER-EV) neu Gerbyd Trydan ag Ymestynnwr Pellter (RE-EV)
•     Cerbyd Trydan Batri (BEV) neu Gerbyd Trydan Pur (PEV)
•     Cerbyd Trydan Celloedd Tanwydd (FCEV).
 
Nid yw’r safon hon yn barnu bod rhywun yn gymwys i gynnal a chadw, gwasanaethu nac atgyweirio systemau foltedd uchel cerbyd trydan a’u cydrannau.

P1 Nodi’r math o gerbyd trydan a chasglu gwybodaeth berthnasol am y cerbyd ac unrhyw beryglon penodol
 
P2 Gwisgo cyfarpar diogelu personol (PPE) a defnyddio cyfarpar diogelu cerbyd (VPE) sy’n briodol i’r gwaith rydych chi’n ei gyflawni
 
P3 Cadarnhau gyda’r unigolyn perthnasol yn eich gweithle fod gweithdrefn gywir y gweithle wedi’i dilyn er mwyn gwneud y cerbyd yn ddiogel cyn dechrau unrhyw waith
 
P4 Gweithio mewn ffordd sydd:
 
P4.1 – yn lleihau cysylltiad â systemau trydanol foltedd uchel a’u cydrannau, neu ddifrod iddynt
P4.2 – yn osgoi difrod i’ch amgylchedd gwaith ac anaf i chi’ch hun ac i eraill
 
P5 Cyfeirio unrhyw broblemau gyda’r cerbyd at yr unigolyn perthnasol yn eich gweithle
 
P6 Dilyn gweithdrefnau’r gweithle i roi gwybod am y gwaith a wnaethoch ar, ger neu gyda’r cerbyd
 
P7 Gwefru’r cerbyd yn ddiogel, fel y bo angen.

Defnyddio gwybodaeth dechnegol
K1 Sut i adnabod cerbyd trydan a’i fath.
K2 Sut i ddarganfod, dehongli a defnyddio ffynonellau gwybodaeth sy’n berthnasol i gerbydau trydan, fel y bo’n briodol i’ch rôl
K3 Sut i adnabod cydrannau trydanol foltedd uchel mewn cerbyd trydan.
 
Gofynion a gweithdrefnau deddfwriaethol a sefydliadol
K4 Y ddeddfwriaeth iechyd a diogelwch, codau ymarfer neu ganllawiau diwydiant a gweithdrefnau’r gweithle sy’n berthnasol i weithio ar, ger neu gyda cherbydau trydan, gan gynnwys y cyfarpar diogelu personol priodol a’i ddefnydd a diogelwch yr amgylchedd gwaith
K5 Y peryglon sy’n gysylltiedig â chydrannau cerbydau trydan foltedd uchel a sut i weithio’n ddiogel gerllaw’r rhain
K6 Gweithdrefnau eich gweithle
K6.1 cadarnhau gyda’r unigolyn perthnasol yn eich gweithle fod y cerbyd wedi cael ei ddiogelu, fel y bo’n briodol i'r gwaith rydych chi’n ei gyflawni
K6.2 atgyfeirio/rhoi gwybod am broblemau wrth weithio gyda cherbydau trydan
K6.3 cofnodi a rhoi gwybod am waith a wnaed ar gerbydau trydan
K7 Goblygiadau dargludedd trydanol trwy’r corff dynol
K8 Goblygiadau meysydd magnetig cryf a’r effeithiau ar ddyfeisiau meddygol
K9 Y rhagofalon sy’n angenrheidiol wrth ddefnyddio cyfarpar gwefru sy’n plygio i mewn  
K10 Gweithdrefnau’r gweithle y mae’n rhaid eu dilyn os bydd sioc drydanol ac argyfyngau eraill, gan gynnwys tân a llifogydd
K11 Y peryglon sy’n gysylltiedig â cherbydau trydan pan fyddant yn dod i gysylltiad â thymereddau eithafol, effaith ac amodau andwyol eraill
 
Gweithrediad systemau cerbydau
K12 Y prif wahaniaethau rhwng cerbyd trydan a cherbyd nad yw’n drydan
K13 Sut i weithredu cerbyd trydan yn ddiogel
K14 Y systemau gwefru sy’n gysylltiedig â cherbydau trydan a sut i’w defnyddio’n ddiogel

1.  Cerbyd – unrhyw gerbyd sy’n cael ei yrru’n rhannol neu’n gyfan gwbl gan drydan. Byddai hyn yn cynnwys
1.1. Hybrid (HEV) – yn cynnwys cerbydau hybrid ysgafn/micro lle’r ystyrir bod y foltedd yn beryglus
1.2.  Hybrid Plygio i Mewn (PHEV)
1.3.  Cerbyd Trydan Pellter Estynedig (ER-EV) neu Gerbyd Trydan ag Ymestynnwr Pellter (RE-EV)
1.4.  Cerbyd Trydan Batri (BEV) neu Gerbyd Trydan Pur (PEV)
1.5.  Cerbyd Trydan Celloedd Tanwydd (FCEV)

Mae’r adran hon yn cynnwys enghreifftiau ac esboniadau o rai o’r termau a ddefnyddiwyd, ond nid yw’n llunio rhan o’r safon.
 
Peryglon sy’n gysylltiedig â chydrannau cerbydau trydanol foltedd uchel – maent yn bodoli nid yn unig yn ystod gwaith ar systemau foltedd uchel, fel y’u pennir uchod, ond hefyd ar bob system yrru drydanol pŵer uchel a systemau storio pwysedd uchel. Dylid dilyn canllawiau gwneuthurwyr cerbydau a chyfarpar bob amser.
Foltedd uchel – Rheoliad Rhif 100 y Comisiwn Ewropeaidd ar gyfer Ewrop y Cenhedloedd Unedig (UNECE) — Dywed darpariaethau unffurf ynghylch cymeradwyo cerbydau o ran gofynion penodol ar gyfer y trên pŵer trydanol: Ystyr ‘Foltedd Uchel’ yw dosbarthiad cydran neu gylched trydan, os yw ei foltedd gweithio yn 60 V ac ≤ 1 500 V DC neu > 30 V ac ≤ 1 000 V AC isradd sgwâr cymedrig (rms). Dylid dilyn Rheoliadau Trydan yn y Gwaith (1989), a chanllawiau cysylltiedig yr Awdurdod Gweithredol Iechyd a Diogelwch (HSE) bob amser.
Ffynonellau gwybodaeth sy’n berthnasol i gerbydau trydan
Mae enghreifftiau’n cynnwys copïau caled o ganllawiau, data ar gyfrifiadur neu ddata a gafwyd o ddangosyddion diagnostig yn y cerbyd.
Gweithrediadau ar, ger neu gyda cherbyd trydan
Unrhyw weithgaredd nad yw’n cynnwys gweithio ar y systemau a’r cydrannau foltedd uchel.