Ymgysylltu â phobl ifanc a'u galluogi i ddefnyddio'r cyfryngau digidol yn eu bywydau bob dydd
Trosolwg
Mae pwysigrwydd deall y byd digidol y mae pobl ifanc yn byw ynddo, a chael yr hyder i helpu pobl ifanc i lywio a chael eu galluogi mewn agweddau ar-lein a thechnolegol eu bywydau, yn hanfodol ar gyfer gwaith ieuenctid mewn oes ddigidol.
Nid yw'n hanfodol i bob gweithiwr ieuenctid ddangos lefelau uchel o arbenigedd technegol, ond mae'n bwysig bod gweithwyr ieuenctid yn gwerthfawrogi'r rôl y mae digideiddio a'r rhyngrwyd yn ei chwarae ym mywydau pobl ifanc ac yn gallu ymgysylltu â nhw.
Mae'r safon hon yn ymwneud â'r sgiliau, dulliau a'r mathau o wybodaeth sydd eu hangen ar weithwyr ieuenctid i ddatblygu eu gallu i gefnogi pobl ifanc i fod yn fwy ymwybodol o'u perthnasoedd a'u hymddygiad ar-lein, meddwl yn feirniadol am y cyfryngau a'r cynhyrchion maen nhw'n eu defnyddio ar-lein, creu cynnwys, defnyddio platfformau ar-lein i rannu eu lleisiau, amddiffyn eu hawliau a dylanwadu ar gymdeithas.
Mae'r safon hon ar gyfer pob ymarferydd gwaith ieuenctid.
Meini prawf perfformiad
Mae'n rhaid eich bod chi'n gallu:
- ymchwilio i gyfleoedd posibl i gydweithio ag asiantaethau eraill a gwella ymarfer
- datblygu gweithgareddau ymgysylltu, eu rhoi ar waith, myfyrio arnynt a’u hailddylunio ar gyfer unigolion a grwpiau mewn perthynas â defnyddio cyfryngau digidol a thechnoleg
- cynllunio gwaith ieuenctid digidol ochr yn ochr ac yn unol ag anghenion pobl ifanc
- asesu lefel llythrennedd digidol pob person ifanc ac addasu gweithgareddau gwaith ieuenctid digidol yn unol â hynny
- asesu'r risgiau sy'n gysylltiedig â gweithgareddau gwaith ieuenctid digidol a'u lliniaru drwy gymhwyso camau priodol
- cynorthwyo pobl ifanc i ddefnyddio'r cyfryngau digidol i hyrwyddo eu syniadau a’u hannog i gymryd rhan mewn gweithgareddau gwaith ieuenctid a chael eu barn arnynt
- herio pobl ifanc i feddwl yn feirniadol am gynnwys a gwasanaethau digidol
- cynorthwyo pobl ifanc i wneud dewisiadau gwybodus am yr offer digidol priodol i ryngweithio, cydweithio a rhannu â grwpiau targed gwahanol
- helpu pobl ifanc i wneud penderfyniadau gwybodus am sut maent am greu presenoldeb ar-lein, sut maent am amddiffyn eu gwybodaeth, â phwy maent am rannu eu cynnwys a sut i reoli hyn drwy ddefnyddio gosodiadau preifatrwydd a chyfrineiriau cryf.
- helpu pobl ifanc i benderfynu a ddylent dderbyn telerau ac amodau gwasanaethau digidol
- helpu pobl ifanc i ddelio â phroblemau y gallent eu hwynebu mewn lleoliadau digidol
- rhoi cyfleoedd i bobl ifanc archwilio codio neu greu cynnwys digidol
- sefydlu a chynnal ffiniau proffesiynol priodol mewn perthnasoedd ar-lein â phobl ifanc
- myfyrio ar eich hunaniaeth ddigidol mewn lleoliad gwaith ieuenctid
- defnyddio technegau gwerthuso i fyfyrio ar effeithiolrwydd ymgymryd â gwaith ieuenctid digidol a gwella ymarfer
- bodloni'r gwerthoedd a'r egwyddorion sy'n sail i waith ieuenctid mewn perthynas â gofynion y safon hon
Gwybodaeth a Dealltwriaeth
You need to know and understand:
- sut mae digideiddio yn llywio cymdeithas, gan gynnwys ei effaith ar waith ieuenctid ac ar bobl ifanc ac ar eu cyfleoedd yn y dyfodol
- anghenion nodweddiadol pobl ifanc, gan gynnwys eu diddordebau, dewisiadau, dyheadau, hobïau, arddulliau ac arferion ar-lein
- diwylliannau digidol pobl ifanc, gan gynnwys sut mae pobl ifanc yn cyfathrebu mewn amgylcheddau digidol
- sut i ategu nodau gwaith ieuenctid presennol gyda chymorth y cyfryngau digidol a thechnoleg
- dulliau cynnwys pobl ifanc ym mhob cam o waith ieuenctid digidol, gan gynnwys gweithgareddau cymheiriaid, rhoi rolau cyfrifol i bobl ifanc, gwirfoddoli
- y rhwystrau sy’n atal pobl rhag cymryd rhan mewn gwaith ieuenctid digidol a sut i'w goresgyn
- y dyfeisiau a'r rhaglenni digidol sydd ar gael a sut i ddewis yr un mwyaf priodol ar gyfer eich gofynion
- y cyfarpar sydd ar gael ar gyfer creadigrwydd digidol, gan gynnwys cyfarpar ffynhonnell agored a rhad ac am ddim
- y mathau o broblemau y gall pobl ifanc eu hwynebu ar-lein, gan gynnwys sut i ymateb i iaith casineb, seiberfwlio a mathau eraill o ymddygiad digroeso ar-lein a rhoi gwybod i blatfformau ac i'r heddlu neu asiantaethau eraill
- sut mae hawlfraint a thrwyddedau yn berthnasol i ddata, gwybodaeth a chynnwys digidol
- y materion cyfreithiol sy'n gysylltiedig â lanlwytho cynnwys digidol, gan gynnwys perchnogaeth data
- lle mae angen gwella eich cymhwysedd digidol neu ei ddiweddaru
- lle i ddod o hyd i gyfleoedd rhannu ymarfer a dysgu yn y maes hwn
- y gwerthoedd a'r egwyddorion sy'n sail i waith ieuenctid mewn perthynas â gofynion y safon hon